ନୂଆଦିଲ୍ଲୀ, ୦୩ ଅଗଷ୍ଟ )- କଂଗ୍ରେସ ମହାସଚିବ (ଯୋଗାଯୋଗ) ଜୟରାମ ରମେଶ ଇ୨୦ ପେଟ୍ରୋଲକୁ ନେଇ କେନ୍ଦ୍ର ସରକାରଙ୍କ ଆଭିମୁଖ୍ୟ ଉପରେ ପ୍ରଶ୍ନ ଉଠାଇ କହିଛନ୍ତି ଯେ, ୨୯ ଜୁଲାଇରେ ସଂସଦରେ କେନ୍ଦ୍ରମନ୍ତ୍ରୀ ନିତିନ ଗଡକରୀଙ୍କ ଦ୍ୱାରା ଦିଆଯାଇଥିବା ଉତରରୁ ଯେତେ ପ୍ରଶ୍ନର ଉତର ମିଳିଛି, ତାହାଠାରୁ ଅଧିକ ନୂଆ ପ୍ରଶ୍ନ ଉଠିଛି। ସେ କହିଛନ୍ତି ଯେ, ଏକପଟେ ସରକାର ଇ୨୦କୁ ସମ୍ପୂର୍ଣ୍ଣ ସୁରକ୍ଷିତ ବୋଲି କହୁଛନ୍ତି, ଅନ୍ୟପଟେ ଉପଭୋକ୍ତାଙ୍କ ଅନୁଭବ ଏବଂ ବିଭିନ୍ନ ପ୍ରାଯୁକ୍ତିକ ଦଲିଲ ଅନେକ ଗୁରୁତ୍ୱପୂର୍ଣ୍ଣ ଚିନ୍ତାର ବିଷୟ ସାମ୍ନାକୁ ଆଣୁଛି।

 

ଜୟରାମ ରମେଶ ସୋମବାର ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଲେଖିଛନ୍ତି ଯେ, ନିତିନ ଗଡକରୀ ସଂସଦରେ କହିଥିଲେ ଯେ ଇ୨୦ ଇନ୍ଧନକୁ ବର୍ଷବର୍ଷର ବୈଜ୍ଞାନିକ ପରୀକ୍ଷା ପରେ କାର୍ଯ୍ୟକାରୀ କରାଯାଇଛି ଏବଂ ଏଥିରୁ ଯାନବାହନର ବ୍ୟାପକ କ୍ଷତି ହେବାର କୌଣସି ପ୍ରମାଣ ନାହିଁ। କିନ୍ତୁ ଗତ କିଛି ମାସ ଧରି ସାରା ଦେଶର ଯାନମାଲିକ ଏବଂ ମେକାନିକମାନେ ମାଇଲେଜ କମିଯିବା, ଇଞ୍ଜିନର କାର୍ଯ୍ୟଦକ୍ଷତା ହ୍ରାସ, ୨୦୨୩ ପୂର୍ବରୁ ନିର୍ମିତ ଯାନଗୁଡ଼ିକର ଇ୨୦ ସହିତ ସୁସଙ୍ଗତତା, କୋଲ୍ଡ-ଷ୍ଟାର୍ଟ ସମସ୍ୟା, ଇଞ୍ଜିନ ଶୀଘ୍ର ଘସିଯିବା, ଫ୍ୟୁଏଲ ଇଞ୍ଜେକ୍ଟର ଜାମ ହେବା, ଫ୍ୟୁଏଲ ଲାଇନରେ ଜଙ୍ଗ ଲାଗିବା ଏବଂ ରବର ଯନ୍ତ୍ରାଂଶରେ ଫାଟ ସୃଷ୍ଟି ହେବା ଭଳି ଅଭିଯୋଗ ଲଗାତାର ଉଠାଉଛନ୍ତି।

 

ସେ କହିଛନ୍ତି ଯେ, ଜୁନ ୨୦୨୬ରେ ୨୦୨୩ ପୂର୍ବରୁ ନିର୍ମିତ ପେଟ୍ରୋଲ ଯାନର ୪୪ ହଜାରରୁ ଅଧିକ ମାଲିକଙ୍କ ଉପରେ କରାଯାଇଥିବା ଏକ ସ୍ୱାଧୀନ ସର୍ବେକ୍ଷଣରେ ବହୁ ସଂଖ୍ୟକ ଲୋକ ଇ୨୦ କାର୍ଯ୍ୟକାରୀ ହେବା ପରେ ନିଜ ଯାନ ଉପରେ ପ୍ରତିକୂଳ ପ୍ରଭାବ ପଡ଼ିଥିବା କଥା କହିଛନ୍ତି।