ଅକଲ୍ୟାଣ୍ଡ, ଜୁଲାଇ 11 । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କହିଛନ୍ତି ଯେ ଭାରତ କେବଳ ଏକ ବଡ଼ ବଜାର ନୁହେଁ ବରଂ ବିଶ୍ୱ ଅଭିବୃଦ୍ଧିର ଏକ "ଲଞ୍ଚପ୍ୟାଡ୍" ରେ ପରିଣତ ହୋଇଛି। ଭାରତର ଅଭିବୃଦ୍ଧି ଯାତ୍ରାରେ ଅଂଶୀଦାର ହେବା ଲାଗି ନ୍ୟୁଜିଲାଣ୍ଡ ଶିଳ୍ପ ଜଗତକୁ ଆହ୍ୱାନ କରି ସେ କହିଥିଲେ ଯେ ଦୁଇ ଦେଶ ମଧ୍ୟରେ ମୁକ୍ତ ବାଣିଜ୍ୟ ରାଜିନାମା (ଏଫଟିଏ) ଦ୍ୱାରା ବାଣିଜ୍ୟ, ନିବେଶ, ପ୍ରଯୁକ୍ତି, ସେବା ଏବଂ ପ୍ରତିଭା ବିନିମୟ ପାଇଁ ନୂତନ ସୁଯୋଗ ସୃଷ୍ଟି ହେବ।
ଅକଲ୍ୟାଣ୍ଡରେ ନ୍ୟୁଜିଲ୍ୟାଣ୍ଡର ପ୍ରଧାନମନ୍ତ୍ରୀ କ୍ରିଷ୍ଟୋଫର ଲକ୍ସନଙ୍କ ସହ ଉଭୟ ଦେଶର ଅଗ୍ରଣୀ ବ୍ୟବସାୟୀ ଏବଂ ସିଇଓମାନଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଭାରତ ଏବଂ ନ୍ୟୁଜିଲ୍ୟାଣ୍ଡ ଗଣତାନ୍ତ୍ରିକ ମୂଲ୍ୟବୋଧ, ଆଇନର ଶାସନ, ବିବିଧତା ଏବଂ ନିରନ୍ତର ବିକାଶ ପ୍ରତି ପ୍ରତିବଦ୍ଧତା ଦ୍ୱାରା ଆବଦ୍ଧ। ଏହି ଫାଉଣ୍ଡେସନ ଦୁଇ ଦେଶର ଆର୍ଥିକ ଭାଗିଦାରୀକୁ ନୂତନ ଉଚ୍ଚତାକୁ ନେଇଯିବ।
ସେ କହିଥିଲେ ଯେ ଦୁଇ ଦେଶ ମାତ୍ର ନଅ ମାସର ରେକର୍ଡ ସମୟ ମଧ୍ୟରେ ଏକ ମୁକ୍ତ ବାଣିଜ୍ୟ ରାଜିନାମା ସ୍ୱାକ୍ଷର କରିଛନ୍ତି, ଯାହା ଦ୍ୱିପାକ୍ଷିକ ସମ୍ପର୍କରେ ଏକ ଉଲ୍ଲେଖନୀୟ ସଫଳତା। ସେ ଆତ୍ମବିଶ୍ୱାସ ବ୍ୟକ୍ତ କରିଥିଲେ ଯେ ଦୁଇ ଦେଶ 2030 ସୁଦ୍ଧା ଦ୍ୱିପାକ୍ଷିକ ବାଣିଜ୍ୟ କାରବାରକୁ 7 ବିଲିୟନ ଆମେରିକୀୟ ଡଲାର (ପାଖାପାଖି 35,000 କୋଟି ଟଙ୍କା) କୁ ଦ୍ୱିଗୁଣିତ କରିବାର ଲକ୍ଷ୍ୟ ହାସଲ କରିବେ।
ପ୍ରଧାନମନ୍ତ୍ରୀ କହିଥିଲେ ଯେ ନ୍ୟୁଜିଲାଣ୍ଡ ଆଗାମୀ 15 ବର୍ଷ ମଧ୍ୟରେ ଭାରତରେ 20 ବିଲିୟନ ଡଲାର ନିବେଶ କରିବା ଲାଗି ପ୍ରତିଶ୍ରୁତିବଦ୍ଧ। ଏହା କେବଳ ଏକ ନିବେଶ ନୁହେଁ, ବରଂ ଭାରତର ବିକାଶ ଯାତ୍ରାରେ ଏକ ଅଂଶୀଦାର ହେବାର ସଂକଳ୍ପ ମଧ୍ୟ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତ ହେଉଛି ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ପ୍ରମୁଖ ଅର୍ଥବ୍ୟବସ୍ଥା। ଦେଶର ଦ୍ରୁତ ଗତିରେ ବୃଦ୍ଧି ପାଉଥିବା ମଧ୍ୟବିତ୍ତ ବର୍ଗ, ଡିଜିଟାଲ ବିପ୍ଳବ, ଆଧୁନିକ ଭିତ୍ତିଭୂମି, କୁଶଳୀ ଯୁବ ଶ୍ରମଶକ୍ତି ଏବଂ ନିରନ୍ତର ଆର୍ଥିକ ସଂସ୍କାର ନିବେଶକମାନଙ୍କ ପାଇଁ ଅଭୂତପୂର୍ବ ସୁଯୋଗ ପ୍ରଦାନ କରୁଛି। ସେ କହିଥିଲେ ଯେ ନୀତିଗତ ସ୍ଥିରତା, ରାଜନୈତିକ ସ୍ଥିରତା ଏବଂ ଭାରତର ନିରନ୍ତର ଅଭିବୃଦ୍ଧି ଏହାକୁ ବିଶ୍ୱ ଆର୍ଥିକ ଅଭିବୃଦ୍ଧିର ଏକ ଗୁରୁତ୍ୱପୂର୍ଣ୍ଣ ଇଞ୍ଜିନରେ ପରିଣତ କରିଛି।
ବିଶ୍ୱକୁ ବାର୍ତ୍ତା ସ୍ପଷ୍ଟ-ଭାରତ କେବଳ ଏକ ବଜାର ନୁହେଁ, ବରଂ ବିଶ୍ୱ ଅଭିବୃଦ୍ଧି ପାଇଁ ଏକ ଲଞ୍ଚ୍ ପ୍ୟାଡ୍
ଉତ୍ପାଦନ ସହ ଜଡ଼ିତ ପ୍ରୋତ୍ସାହନ (ପିଏଲଆଇ) ଯୋଜନାର ଲାଭ ଉଠାଇବା ଲାଗି ଶିଳ୍ପ ଜଗତକୁ ଅନୁରୋଧ କରି ପ୍ରଧାନମନ୍ତ୍ରୀ କହିଥିଲେ ଯେ ଖାଦ୍ୟ ପ୍ରକ୍ରିୟାକରଣ ଠାରୁ ଆରମ୍ଭ କରି ବୟନ ଶିଳ୍ପ ପର୍ଯ୍ୟନ୍ତ 14ଟି କ୍ଷେତ୍ରରେ ପାଖାପାଖି 20 ବିଲିୟନ ଡଲାର ମୂଲ୍ୟର ପ୍ରୋତ୍ସାହନ ଦିଆଯାଉଛି। ସେ ନ୍ୟୁଜିଲ୍ୟାଣ୍ଡର କମ୍ପାନୀମାନଙ୍କୁ ଭାରତର ଉତ୍ପାଦନ କ୍ଷେତ୍ରର ଏକ ଅଂଶ ହେବାକୁ ଆହ୍ୱାନ କରିଥିଲେ।
ସେ କହିଥିଲେ ଯେ ଭାରତ ବିମାନ ବନ୍ଦର, ଆଞ୍ଚଳିକ ବିମାନ ସଂଯୋଗ, ବିମାନ ମାଲ ପରିବହନ ଏବଂ ପର୍ଯ୍ୟଟନର ଦ୍ରୁତ ସମ୍ପ୍ରସାରଣ ଦେଖୁଛି ଏବଂ ଦେଶ ବିଶ୍ୱର ତୃତୀୟ ସର୍ବବୃହତ ଘରୋଇ ବିମାନ ଚଳାଚଳ ବଜାରରେ ପରିଣତ ହୋଇଛି। ଦୁଇ ଦେଶ ମଧ୍ୟରେ କାର୍ଗୋ କରିଡର, ବିମାନ ସଂଯୋଗ ଏବଂ ମିଳିତ ପର୍ଯ୍ୟଟନ ପ୍ୟାକେଜ ବିକଶିତ କରିବା ଲାଗି ସେ ପରାମର୍ଶ ଦେଇଥିଲେ।
ପ୍ରଧାନମନ୍ତ୍ରୀ କହିଥିଲେ ଯେ ଫିଣ୍ଟେକ୍ କ୍ଷେତ୍ରରେ ଭାରତ ହେଉଛି ବିଶ୍ୱର ଅଗ୍ରଣୀ ରାଷ୍ଟ୍ର ଏବଂ ବିଶ୍ୱର ବାସ୍ତବ ସମୟର ଡିଜିଟାଲ ଦେୟର ପ୍ରାୟ 50 ପ୍ରତିଶତ ଭାରତରେ ହୋଇଥାଏ। ସେ ସୂଚନା ଦେଇଥିଲେ ଯେ ମହାକାଶ କ୍ଷେତ୍ରକୁ ଘରୋଇ ଭାଗିଦାରୀ ପାଇଁ ଉନ୍ମୁକ୍ତ କରିବା ପରେ ଦେଶରେ ଗୋଟିଏ ୟୁନିକର୍ଣ୍ଣ ସମେତ 400ରୁ ଅଧିକ ମହାକାଶ ଷ୍ଟାର୍ଟଅପ୍ କାର୍ଯ୍ୟ କରୁଛି।
ମୁକ୍ତ ବାଣିଜ୍ୟ ରାଜିନାମା ମାଓରୀ ସମ୍ପ୍ରଦାୟର ବ୍ୟବସାୟକୁ ମଧ୍ୟ ସ୍ୱତନ୍ତ୍ର ଗୁରୁତ୍ୱ ଦେଇଥାଏ ବୋଲି ସେ କହିଛନ୍ତି। ଭାରତ ଏବଂ ନ୍ୟୁଜିଲାଣ୍ଡ ସହଭାଗୀ ମୂଲ୍ୟବୋଧ ଆଧାରରେ ସମାବେଶୀ ଏବଂ ସ୍ଥାୟୀ ବାଣିଜ୍ୟର ଏକ ନୂତନ ମଡେଲ ବିକଶିତ କରିପାରିବେ।
ଏକ ଉଚ୍ଚାଭିଳାଷୀ ବ୍ୟବସାୟିକ ରୋଡମ୍ୟାପ୍ ପ୍ରସ୍ତୁତ କରିବା ଲାଗି ଉଭୟ ଦେଶର ଉଦ୍ୟୋଗ ଜଗତକୁ ଅନୁରୋଧ କରି ପ୍ରଧାନମନ୍ତ୍ରୀ ଉଭୟ ପକ୍ଷଙ୍କୁ ସେମାନଙ୍କ ସାମର୍ଥ୍ୟକୁ ମିଶାଇ ଅତି କମ୍ରେ ପାଞ୍ଚଟି ପ୍ରମୁଖ ମିଳିତ ପ୍ରକଳ୍ପ ଚିହ୍ନଟ କରିବା ଏବଂ ସମୟବଦ୍ଧ ପ୍ରଗତି ସୁନିଶ୍ଚିତ କରିବା ଲାଗି ଏକ ପ୍ରଭାବୀ ସମୀକ୍ଷା ବ୍ୟବସ୍ଥା ବିକଶିତ କରିବା ଲାଗି କହିଥିଲେ। ଏହା ଭାରତ-ନ୍ୟୁଜିଲାଣ୍ଡ ଆର୍ଥିକ ଭାଗିଦାରୀର ପ୍ରକୃତ ସମ୍ଭାବନାକୁ ସମ୍ପୂର୍ଣ୍ଣ ଭାବେ ସାକାର କରିବାରେ ସହାୟକ ହେବ ବୋଲି ସେ କହିଥିଲେ।
